Dokumental proiektuak garatzeko lehen tailerra, Centa Eskolak, Eikenek eta EiTBk bultzatua -azken bi horiek Gidoi Faktoriaren bitartez- martxoaren lehen hamabostaldian egin zen, eta hari esker, 13 ikaslek “beren ideiak dokumental proiektu bat bihurtzeko behar adinako ezagutza lortu dute, kontuan hartuz fabrikazio katearen alderdi guztiak, garapenetik banaketaraino”, Oscar Tejedor proiektuaren tutoreak azpimarratu duen moduan. 

Zentzu horretan, ikastaroaren antolatzaileek beren poza agertu dute, helburu nagusia aurrera egitea baitzen, alderdi teorikoan nahiz praktikoan, parte hartzaile bakoitzaren proiektuen garapenean. Ondorioz, ikasle kopuru mugatuak eta prestakuntza programaren diseinuak funtsezko kontzeptuak asimilatzen lagundu die parte hartzaileei. 

Era berean, Oscar Tejedorrek aurkeztu duen azken txostenean islatzen den moduan, tailerrak “errealitatearekin harremanetan jartzen lagundu die, eta, batez ere, proiektu dokumental baten konplexutasunaz jabetzen”. Gainera, dokumental baten eraikuntza kateko hainbat auzi landu dituzten profesionalen parte hartzeak aukera eman die garapenaren hainbat fasetan murgiltzeko, profesionalen errealitatea ezagutzeko eta hainbat kontzepturen ikuspegi askotarikoaz jabetzeko.

Bere aldetik, Sani Patiño Centa Eskolako zuzendariak uste osoz adierazi zuen tailerrak “balio izan duela ikasleek, ikasteaz gainera, beren kezka berak dituen jendea ezagutzeko, baita konturatzeko ere dokumental bat egitea ez dela dirudien bezain erraza”.   Era berean, azpimarratu zuen ikasleen gogobetetasun indizea 5etik 4,75ekoa izan dela.

Eikenek eta EiTBk bultzatutako Innova Basque Audiovisual ekimena, programa pilotuen ekoizpena sustatzea helburu duena, Cannesko MIPFORMATS azokako hitzaldi ofizialetako baten protagonista izango da, aste honen amaieran, MIPTV azokarako sarrera gisa. Hitzaldia Jaialdien Jauregiko auditoriumean emango da, apirilaren 7an, igandean, 15:00etan, eta Aizpea Goenaga Etxepare Institutuko zuzendaria, Itziar Mena Eikeneko zuzendaria eta Aiala Fernández Klusterreko nazioartekotze arloko arduraduna bilduko dira bertara. Era horretan, azokara bilduko den nazioarteko sektorearen zati handi batek arreta euskal ikus-entzunezkoen industrian jar dezan bultzatuko du Innova Basque Audiovisualek.

MIPFORMATSeko hitzaldien zerrendan sartu izana aukera berri bat izango da euskal ikus-entzunezkoen sektorerako, munduko merkatu eta enpresa nagusiekin harremanetan jartzeko aukera emango baitu. Zentzu horretan, Innova Basque Audiovisual MIPFORMATSen aurkeztetik haratago doa Eikenen estrategia; izan ere, MIPTV azokan, apirilaren 8tik 11ra bitarte, euskal ikus-entzunezkoen sektoreak stand bat edukiko du (R31.29) azoka esparruan, 'Basque Audiovisual, the international brand of the basque audiovisual industry lelopean'.

Hala, euskal ikus-entzunezkoen sektoreak marka horren babespean MIPTV azokan -munduko merkatu nagusietako batean- parte hartzen duen ondoz ondoko zazpigarren aldia izango da hau. Aurreko edizioetan bezalaxe, Eikenek eta Etxepare Institutuak euskal ikus-entzunezkoen katalogoko berritasunak eramango dituzte Cannesera, eta, aurten, hamar enpresa bilduko dira bertara: Baleuko, Basque Stream, Dibulitoon, EiTB, Expressive, Jarkatza, K 2000, Mediabask, Pausoka eta Somuga.

Eiken - Euskadiko Ikus-entzunezkoen Klusterrak, Bizkaiko Foru Aldundiarekin lankidetzan, BEAZ sozietatearen bitartez, ordezkaritza komertzial bat jarri du abian, baita Israelgo ikus-entzunezko merkatuaren azterketa ere, New Media arloan dagoen aurreratuenetako bat.  Euskal ordezkaritza hamabi enpresa eta erakundetako ordezkarik osatua da; hiru egunean zehar herrialde horretako sorkuntzazko eta ikus-entzunezko jarduera gune nagusiak bisitatuko ditu.

Hala, Eiken buru den ordezkaritzak ekintzailetza eta hazitegi ereduak ikusi ahal izango ditu (azken bi hamarkadetan Israel gailendu den jarduera), baita New Media enpresak, Broadcasterrak, Ekoiztetxeak, Banatzaileak eta zinema babesten duten erakundeak ere. Aurreikusi diren bilera guztiak erakundeen arduradun nagusiekin egingo dira, eta horrek solaskidetza mailarik handiena bermatuko du.

Euskal ordezkaritza hamabi pertsonak osatzen dute, besteak beste, Eikeneko presidente Juan Mari Gurrutxagak, Eikeneko zuzendari Itziar Menak, eta Eikeneko Nazioarteko Arloko eta “Smart Culture” proiektuko Arduradun Aiala Fernandezek; Euskadiz gainera, Frantzia, Erresuma Batua, Italia, Bulgaria, Danimarka, Holanda eta Madrilgo erakundeek parte hartzen dute.

Tel Aviven, gainera, zortzi euskal enpresatako ordezkariak daude: EiTB, Centa, Expressive, Irusoin, Jarkatza, Mixer, Pausoka eta Tecnalia, eta, gainera, BEAZeko zuzendari Juan Diego, eta Alium aholkularitzako Miguel Ríos.

Prentsa Oharra

Patty Geneste, Formatuen Aitortza eta Babeserako Elkartearen (FRAPA) lehendakaria, Bilbon izango da, datorren martxoaren 19an, proiektuak nazioartekotzeari buruzko masterclass saio bat eskaintzeko. Eikenek eta EiTBk (Eikeneko kidea) saio pilotuen ekoizpena sustatzeko xedez sorturiko Innova Basque Audiovisual ekimenaren bigarren edizioaren barruan antolatu da jardunaldi hori, zehazki.

Euskadiko ikus-entzunezkoen industriako profesionalei begira antolatu da topaketa; hain zuzen ere, telebistako formatuen esparruko munduko profesional ospetsuenetako baten eskola magistralean parte hartzeko aukera izango dute, lehen aldiz. Antolatzaileek nabarmendu dute, gainera, Patty Genestek ekimen honetan parte hartzeko funtseko arrazoiak izan direla Innova Basque Audiovisual lehen ekimenean egindako lana eta aurkeztutako proiektuen kalitatea.

Masterclass saioa martxoaren 19an egingo da, EiTBren Multibox aretoan, Bilbon, goizez eta arratsaldez. 9:00etatik 14:00etara, “nazioarteko merkatuetan produktuak arrakastaz saltzeko” gakoen berri emango du Absolutely Independent enpresako lehendakariak. Arratsaldean, berriz, 15:00etatik 18:00etara, "kontratua nola negoziatu eta idatzi "aztertzeko tailerra gidatuko du.

Prentsa Oharra

Programa

Dossier

Eiken Euskadiko Ikus-entzunezkoen Klusterrak EikenBANK ekimena abian jarriko du, seigarren urtez, arlo profesionalaz kanpoko talentuak erakartzeko xedez. Ekimenari hasiera emateko, aurkezpen ekitaldi berezia egingo da, otsailaren 7an, Euskal Herriko Unibertsitateko Gizarte Zientziak eta Komunikazio Fakultatean. Topaketa horretan, programaren nondik norakoen berri ez ezik, "masterclass" bat emango da, "pitching" deritzonari buruz (proiektuak epaimahai baten aurrean defendatzea) eta proiektuei hasieratik bertatik “nazioarteko” ikuspegia atxikitzeko gakoei buruz.

Jardunaldiaren bidez, talentuak erakartzeko eta talentu horiek enpresa arloarekin harremanetan jartzeko prozesuanEikenBANK eragile nagusi modura nabarmendu nahi du Eikenek, baita ideiak sortzeko prozesua aberastu ere. Hasierako aurkezpen ekitaldian, Pausoka (Eikeneko kidea) produkzio etxearen "Goenkale" saileko gidoilarien koordinatzaile Pedro Fuentesek eta Eikenen nazioarteko arloaren arduradun Aiala Fernandezek parte hartuko dute, besteak beste.

Prentsa oharra